Work Text:
– Сазором... инескеть, ускомак кудов.
Хелейна васенцеде марясь Эйгонь вайгелензэ истя авардицякс.
– Мезе теевсь?
– Ускомак...
– Паро. Ансяк ёвтык косат.
Хелейна ардсь Эймондонь (эли Хелейнань эсензэ? – ялатеке) машинасонть кодамояк кудонтень Чичав Песэнть. Тосо Эйгон аштесь озадо кенкшенть икеле кузтеманть лангсо. Эйгононь чамаванзо ваднезельть якстере помадазо ды чудиця тушось. Мольсь телесь, а сон аштесь тесэ, ушосо, ансяк шожда капрононь колготатнесэ ды нурька якстере атласонь платиясонть. Хелейна ёртовсь тензэ, вельтизе эсензэ пальтосонзо:
– Курок мольтяно машинас.
Хелейна озавтызе сонзэ уцалце озамо тарканть лангс ды сонсь озась мартонзо. Эйгон авардсь, ды Хелейна саизе Эйгононь чаманзо кедьсэнзэ.
– Састо, састо... – сэтьместэ тошкась сон. – Весе карми паро, леляй...
Хелейна варштась Эймондонь кумажанзо лангс ды неизе веренть.
– Вересь... Те тонь?..
Эйгон кувсесь:
– Арась. Те сонзэ... панарт... Сон... Те авась...
Эйгон путызе прянзо Хелейнань лавтовонзо лангс. Сон, теке вишка катка левксэсь, педясь Хелейнанень. Хелейна ушодсь вадяшамонзо пряванзо.
– Леляй, бути сон... нарьгинзить, паряк, тенек седе парсте васня ардомо пичкавтома кудов эли полицияв?
Эйгон седе виевстэ кармась лайшеме. Весе семиясонок содась, кода важоди Эйгон. Натой Эймонд шкань-шкань мерекшнесь тензэ ёртомс сень, ёвтакшнось, келя, тетяст авардевель, аваст чамазо, зярдо сон арси теде, неяви, теке сон калмамо таркасо, пандя, Эйгон, велявтык кудов... Ансяк Эйгон свал мерсь: тензэ кияк а эряви, сон сонсь кочки, кода тензэ эрямс.
– Ней тон, арсема... жалят эйсэнь, – Эйгон поладсь авардеме, – жалямодо марян прям... рудазокс... чавозь кискакс... аволь ломанекс...
Хелейна видьстэ ёвтась каршонзо:
– Мон а маштан марямо эмпатия.
Теде Эйгон мекс-бути сэтьмельгадсь, сон эзь аварде, ансяк кувсесь. Сон вешизе:
– Ускомак кудов, инескеть... Тень эряви кудот... Ансяк аволь тетянок мансонось... Кудот...
– Паро.
Зярдо Эймонд неизе Эйгононь, конась Хелейнань нежедеманзо марто совась сынст квартиразост, кельместэ кевкстизе:
– Вана ТЕ карми улеме монь кудосом? Эйкакштнэ курок стить. Сынь неизь ТЕНЬ?
Хелейна кепедизе прянзо.
– Сынь а нейсызь сонзэ истямокс. Те пек эрявиксстэ, Эймонд, – састо, ансяк калгодосто мерсь сон.
Сон аволь сеедьстэ кортась истя вайгельсэ – кода патясь ды семиянь прязо. Эймонд чаравстсь прясонзо ды тусь кухняв.
Хелейна ветизе Эйгононь эсензэ нупальзэнть ды мадевтизе ацамонть лангс. Эйгон таргась тензэ кедензэ:
– Илямак кадо... Илямак нолда...
Хелейна озась вакссонзо ды саизе кедензэ.
– Нама, мон зярдояк а кадтан, леляй. Мон ансяк тейса чаенть.
Хелейна стясь, тусь нупальстэнть ды саизе телефононть. Сон муизе Бэйлань номерензэ – Бэйла важодсь полициясо.